طلعت على السطوح هز الهوا كمى كل البنات اتجوزت وانا قاعده عند امى
قعدت جوه البيت هز الهوا شالى كل البنات مبسوطه وحزين انا حالى
طلعت بره البيت هز الهوا المنديل كل البنات حلوين وانا الشكل ليه دليل
روحت عند الساقيه هز الهوا الخلخال كل البنات متهنيه وانا شريدة البال
وقفت جمب التوته هز الهوا الاحساس كل البنات محبوبه وانا كرهانى الناس
ومشيت على السكه هز الهوا الطرحه كل البنات فرحانه ومحرومه انا الفرحه
وهربت على الترعه اشكى لليل حالى وفضلت ابكى وانوح على اللى جرى لحالى وانده بعلو الصوت واقول يا ناس مالى لارد الليل عليه ولا حد ريح بالى
رجعت على البيت مهمومه والدمع فى عنيه والسر بين ضلوعى بخفيه فى عنيه سهم المحبه مجاش ولا قرب ليه ولا عمرى شوفت عطف ولا شوفت يوم حنيه
انا اللى ليلى طال سهرانه بتألم بشكى بصوت مكسور من غير ما بتكلم وجرح الوحده ليه أثر فى القلب بيعلم كأنه استاذ قاسى بالضرب يعلم لافيوم هيرحم ولا يوم هيسلم
احكى لمين حالى والعذاب اشكيه ومين يسمع منى ولمين انا احكى مبقاش بأديه غير انى انا ابكى على اللى فات من عمرى ده العمر بيجرى زى البحور ياناس الميه فيه بتجرى
ادى حكايتى والقصه على جدران قلبى مكتوبه ودى نهايتى فى كتب الحزن مكتوبه وخلاص خطاوى القلب فى الدنيا محسوبه والفرحه فى قلبى زى الحب محدوده وانا كلامى انتهى وانا لسه موجوده
وبقول وداع للحب والاحلام يا خساره الصحبه وخساره الايام كتبت انا بدمى اغلى واحلى كلام وبقول يا خساره الاحساس والغرام لو كنت اخترت اكون حد غيرى كنت اعيش احلام لكن فى النهايه ليكوا منى سلام
الكاتب :ميجا المصرى
